काठमाडौं । भारत र पाकिस्तानबीच तनाब बढिरहेको छ । पाकिस्तानले भारतीय जासुसी ड्रोन खसालेको दाबी गरेको छ भने भारतले पाकिस्तानका रक्षामन्त्रीको सामाजिक सञ्जाल एक्सको खाता भारतमा बन्द गरिदिएको छ ।
पाकिस्तानले नियन्त्रण रेखामा आफ्नो हवाई क्षेत्र उल्लङ्घन गरेको भारतीय जासुसी ड्रोन खसालेको पाकिस्तानले दाबी गरेको हो। सुरक्षा स्रोतहरूलाई उद्धृत गर्दै पाकिस्तानको सरकारी रेडियोले भाब्बरको मनावर सेक्टरमा भारतले ड्रोन प्रयोग गरेर जासुसी गर्ने प्रयास गरेको रिपोर्ट प्रसारण गरेको हो।
यद्यपि, यसबारे भारत सरकारले अहिलेसम्म कुनै प्रतिक्रिया दिएको छैन। अप्रिल २२ मा जम्मू कश्मिरको पहलगाममा भएको आतंकवादी हमलामा २६ जनाको मृत्यु भएको थियो।
यस आक्रमणपछि, भारतले पाकिस्तानविरुद्ध सिन्धु जल सन्धि निलम्बन गर्ने, अटारी सीमा बन्द गर्ने र भिसा सुविधा फिर्ता लिने जस्ता कदमहरू चालेको छ । त्यसको प्रतिक्रिया स्वरूप, पाकिस्तानले पनि दुई देशबीचका सबै द्विपक्षीय सम्झौताहरू निलम्बन गर्ने, शिमला सम्झौतासहित, हवाई क्षेत्र र सीमाना बन्द गर्ने, व्यापार निलम्बन गर्ने र भारतलाई पाकिस्तानी हवाई क्षेत्र प्रयोग गर्न प्रतिबन्ध लगाएको छ ।
पाकिस्तानको राष्ट्रिय सुरक्षा परिषद्ले सिन्धु जल सन्धि निलम्बन गर्ने भारतको निर्णयलाई अस्वीकार गरेको छ । सन्धि अन्तर्गत पाकिस्तानको भागबाट पानीको प्रवाह रोक्ने वा मोड्ने कुनै पनि प्रयासलाई युद्धको कार्य मानिने बताउँदै पूर्ण शक्तिका साथ जवाफ दिइने जिकिर गरेको छ।
भारतजस्तै पाकिस्तानले पनि रक्षा सल्लाहकार र उनीहरूका सहयोगीहरूलाई देश छोड्न भनेको छ र आफ्ना कूटनीतिक कर्मचारीहरूको संख्या सीमित गरेको छ।
यसैबीच, पाकिस्तानका रक्षामन्त्री ख्वाजा आसिफको एक्स खाता भारतमा ब्लक गरिएको छ । पहलगाम आक्रमणपछि बीबीसीलाई दिएको एक अन्तर्वार्तामा ख्वाजा आसिफले भारतले पाकिस्तानविरुद्ध चालेका कदमहरूको जवाफ दिएका थिए ।
