काठमाडौं । भारतको ओडिसा र पश्चिम बंगालमा समुद्री आँधी ‘दाना’को प्रभाव देखिन थालेको छ । त्यहाँ भारी वर्षा भइरहेको छ । दुवै राज्यमा आँधीलाई मध्यनजर गर्दै सतर्कता अपनाउन मौसम विभागले चेतावनी जारी गरेको छ ।
दाना समुद्री आँधी रफ्तारमा उत्तरपश्चिम दिशातर्फ अघि बढिरहेको छ । यो आँधी आजै ओडिसा र पश्चिम बंगालको तटीय क्षेत्रमा पुग्ने चेतावनी मौसम विभागले दिएको हो । मौसम विज्ञान विभागले जटीय क्षेत्रका केही जिल्लामा रेट अलर्ट नै जारी गरेको हो ।
दुवै प्रदेशका स्थानीय प्रशासनले सतर्कता सुरु गरी लाखौं मानिसलाई सुरक्षित स्थानतर्फ सारिसकेको छ भने झण्डै १० लाख मानिसहरुलाई सुरक्षित स्थानतर्फ सार्ने तयारी छ । भारतीय मौसम विज्ञान विभागका निर्देशक मनोरमा मोहन्तीले दाना आँधीले गतराति घातक रुप लिएको र विगत ६ घण्टादेखि १२ किलोमिटर प्रतिघण्टाको गतिमा उत्तर-पश्चिम दिशामा अगाडि बढिरहेको बताउनुभएको छ ।
अहिले यो आँधी मध्य र उत्तर-पश्चिम बंगालको खाडीमा ओडिशाको प्रायद्वीपबाट २ सय ६० किलोमिटर दक्षिण-पश्चिममा रहेको छ । तटीय क्षेत्रमा आइ पुग्दा यसको गति प्रतिघण्टा १ सय २० किलोमिटरसम्म हुने चेतावनी दिइएको छ ।
आँधी आउने सम्भावनालाई हेरेर पश्चिम बंगाल सरकारले नौ जिल्लाका सबै विद्यालय बन्द गर्न निर्देशन दिएको छ । स्थानीय प्रशासनले समुद्रमा माछा मार्न नजान चेतावनी दिएको छ । माछा मार्न गएकाहरुलाई पनि फिर्ता बोलाइएको छ ।
ओडिसाको पर्यटकीय स्थल पुरीबाट मंगलबार नै पर्यटकलाई बाहिर निकालिएको छ । अहिले यहाँ कुनै पनि पर्यटकलाई अनुमति दिइएको छैन । ओडिसाका १४ जिल्लाका सबै विद्यालय २५ तारिखसम्म बन्द गरिएको छ । त्यस्तै तटीय क्षेत्र नजिक रहेका जिल्लाहरुको विमानस्थललाई बन्द गर्न निर्देशन दिइएको छ भने दुई सय तीन रेललाई रद्द गरिएको छ ।
ओडिसा र पश्चिम बंगाल सहित ६ राज्यलाई हाई हलर्टमा राखिएको छ ।