रुकुम पूर्व । लुम्बिनी प्रदेशको एक मात्र हिमाली जिल्ला रुकुम पूर्वको पुथाउत्तरगंगा गाउँपालिकामा उपाध्यक्ष पदका लागि शान्तिपूर्ण रूपमा मतदान जारी छ । बिहान ७ बजेदेखि सुरू भएको मतदानमा मतदाताको उत्साहजनक उपस्थिति रहेको छ ।
कुल ११ हजार तीन सय ८० मतदाता रहेको यस पालिकाभित्रका २२ मतदान केन्द्रमा बिहानैदेखि मतदाताहरू लामबद्व भएको सहायक निर्वाचन अधिकृत ईश्वरी सुवेदीले जानकारी दिनु भयो । अहिलेसम्म कति मत खस्यो भनेर प्रारम्भिक तथ्यांक नआइसकेको भए पनि मतदाताको उपस्थिति सन्तोषजनक र अवस्था शान्तिपूर्ण रहेको उहाँको भनाइ छ ।
यस पालिकामा रिक्त रहेको पालिका उपाध्यक्ष र २ नं. वडा अध्यक्षमध्ये वडा अध्यक्षमा माओवादी केन्द्रका उम्मेदवार जगत घर्ती सर्वसम्मत निर्वाचित भइसकेका छन् । पालिका उपाध्यक्षका लागि भने कांग्रेस-एमाले गठबन्धनबाट केशकुमारी तुलाचन र माओवादी केन्द्रबाट नरपुरा बुढा उम्मेदवार रहेका छन् ।
