काठमाडौं । त्रिभुवन विश्वविद्यालयको ४९औं दीक्षान्त समारोह आज (सोमबार) भव्य रुपमा सम्पन्न भएको छ । त्रिपुरेश्वरस्थित दशरथ रंगशालामा भएको दीक्षान्त समारोहमा १२ हजार ४१५ विद्यार्थी दीक्षित भए ।
समारोहको प्रमुख अतिथिका रुपमा राष्ट्रपति रामचन्द्र पौडेल सहभागी थिए । यस्तै कुलपति एवं प्रधानमन्त्री पुष्पकमल दाहाल पनि दीक्षान्त समारोहमा सहभागी बने । उनले योग्यताका आधारमा त्रिभुवन विश्वविद्यालयमा अब उपकुलपतिको नियुक्ति गर्ने प्रतिबद्धता जनाए ।
त्रिभुवन विश्वविद्यालयबाटै राजनीतिक भागबन्डाको अन्त्य गर्ने भन्दै कुलपति दाहालले नेपालमा आधारभूत शिक्षा मात्र निःशुल्क नभई विश्वविद्यालय शिक्षा पनि सर्वसुलभ बनाउने दिशामा काम गरिरहेको दाबी गरे । ‘कतिपय विकसित देशमा आधारभूत शिक्षा मात्र निःशुल्क होइन, विश्वविद्यालय शिक्षा पनि सर्वसुलभ बनाइएको छ । हामी पनि सोही दिशामा अग्रसर भइरहेका छौं,’ उनले भने, ‘आर्थिक हैसियत भएकाहरुको मात्र उच्च शिक्षामा पहुँच हुनु हुँदैन भन्ने हाम्रो स्पष्ट दृष्टिकोण छ । विपन्न वर्गले शिक्षा प्राप्त गर्न नसक्ने स्थिति हटाइ समतामूलक, सबै वर्ग, समुदायले उच्च शिक्षा सर्वसुलभ हुनुपर्दछ ।’
उनले आर्थिक हैसियत भएकाहरुको मात्र उच्च शिक्षामा पहुँच हुन नहुने पनि धारणा राखे । उच्च शिक्षा नीतिअनुरुप विश्वविद्यालय शिक्षामा पनि समयानुकूल सुधार गर्दै लगिएको कुलपति दाहालको भनाइ छ ।
‘उच्च शिक्षा नीतिअनुरुप विश्वविद्यालय शिक्षामा पनि समयानुकूल सुधार गर्दै लैजाने हाम्रो प्रयास छ,’ कुलपति दाहालले भने, ‘देशको समृद्धिमा प्राविधिक जनशक्तिको महत्त्वपूर्ण योगदान रहन्छ । त्रिभुवन विश्वविद्यालयबाटै राजनीतिक भागबन्डाको अन्त्य गर्ने र मेरिटका आधारमा भीसी नियुक्ति गर्ने प्रतिबद्धता जनाउँछु ।’
दाहालले आफ्ना विद्यार्थीलाई विश्वबजारमा अब्बल प्रमाणित गर्नसक्ने बनाउनु त्रिभुवन विश्वविद्यालयको आजको चुनौती रहेको पनि धारणा राखेका थिए ।
त्रिवि परीक्षा नियन्त्रण कार्यालयका परीक्षा नियन्त्रक पुष्पराज जोशीका अनुसार यस वर्ष १२ हजार ४१५ विद्यार्थी दीक्षान्त समारोहमा सहभागी भएका छन् ।
जोशीका अनुसार त्रिवि ग्रेसलिस्टमा परेका ७४ हजार ७४९ विद्यार्थीमध्ये यसपटक १२ हजार ४१५ जनाले दीक्षान्त समारोहमा सहभागिताका लागि आवेदन दिएका थिए । २०७९ असार १ देखि २०८० जेठ मसान्तसम्म उत्तीर्ण गरेका विद्यार्थी दीक्षान्त समारोहमा सहभागी भएका थिए । गत वर्ष भने १० हजार तीन सय विद्यार्थी दीक्षान्त समारोहमा सहभागी भएका थिए ।
स्नातक तहतर्फ आठ हजार ९८ जना, स्नातकोत्तर तहतर्फ चार हजार एक सय चार, एमफिलतर्फ ४४ तथा विद्यावारिधितर्फ ११२ विद्यार्थी दीक्षित भएका छन् । दीक्षान्त समारोहमा विभिन्न पदक र पुरस्कारसमेत वितरण गरिएको थियो ।
हेरौं दीक्षान्त समारोहका थप तस्बिर :
