पोखरा । असारमा लगाएको धानखेतीलाई परम्परागत शैलीमा दाइँ गरी खेती भित्र्याउने कार्यलाई नयाँपुस्ता र विदेशी पर्यटकमाझ चिनाउने उद्देश्यले पोखरामा दोस्रो दाइँ महोत्सव आयोजना गरिएको छ ।
‘पोखरा सबै मौसमका लागि’ भन्ने नारासहित पोखरा पर्यटन परिषद्ले पोखरा महानगरपालिका-१९ पुरून्चौरको चुरूंगामा शनिबार दोस्रो संस्करणको दाइँ महोत्सव आयोजना गरिएको हो । एकदिने महोत्सवमा उत्कृष्ट गोरू पालक, उत्कृष्ट धान उत्पादक कृषकलाई पुरस्कृत गरिनुका साथै धान चुट्ने, परालको भारी बाँध्ने र गुन्द्री बुनाइ प्रतियोगिता आयोजना गरिएको थियो ।
महोत्सवमा सहभागि आन्तरिक एवं बाह्य पर्यटकले परम्परागत रूपमा दाइँ हालेको प्रक्रिया खेतमै नजिकबाट नियाले । उनीहरूले धानलाई चामाल बनाउने प्रक्रियाबारे जान्ने र बुझने अवसर पाए । कृषिमा आधुनिकरण बढ्दै गर्दा परम्परागत प्रक्रियाबाट किसानले थोरै साधन र मेहनतमा यति धेरै उत्पादन निकाल्छन् भन्ने कुरा यहाँ आएपछि बुझेंको विदेशी पर्यटकले बताए ।
हरेक वर्ष असारमा रोपाइँ महोत्सव गर्दै आएको पोखरा पर्यटन परिषद्ले गत वर्षदेखि दाइँ महोत्सव समेत सुरू गरेको हो । रोपाइँ महोत्सवमा सहभागि विदेशी पर्यटकले धान उत्पादनको जिज्ञासा राख्ने गरेको भन्दै महोत्सवबाट उक्त प्रक्रियाबारे बुझाउन खोजिएको कार्यक्रम संयोजक हरि भुजेलले बताउनुभयो ।
नेपाललाई हिमाल र ट्रेकिङका अलावा कृषि-पर्यटनको गन्तव्यका रूपमा प्रवर्द्धन गर्न यस्तो कार्यक्रम प्रभावकारी हुन सक्ने आयोजकको अपेक्षा छ । पोखराको बढ्दो सहरीकरण र स्थानीयको बदलिँदो जीवनशैलीले यो महोत्सव परम्परागत खेती प्रणालीलाई पुस्तान्तरण गर्न स्थापित हुने अपेक्षा राखिएको छ । महोत्सवमा स्थानीय तथा पर्यटक गरी करिब आठ सय दर्शकको सहभागिता थियो ।
.png&w=400&height=300)
