काठमाडौं । नेपाल उद्योग वाणिज्य महासंघले निर्यातमा नगद अनुदानको व्यवस्था पुन: गर्न सरकारसँग आग्रह गरेको छ ।
महासंघले नगद अनुदान स्थगनको निर्णयले लगानी, निर्यात र रोजगारीमा गम्भीर असर पर्ने भन्दै पुन: सञ्चालन गर्न आग्रह गरेको हो । नेपालमा वैदेशिक व्यापारमा निर्यातको स्थिति अति कमजोर भई व्यापार घाटा दिनानुदिन बढ्दै गईरहेको सन्दर्भमा सरकारले १३ वर्षदेखि दिँदै आएको अनुदान जारी राख्न महासंघले माग गरेको हो ।
गत बिहीबार उद्योग विभागले नगद अनुदानको व्यवस्था स्थगन गरेपछि व्यवसायीहरु निरुत्साहित भएका हुन् । १३ वर्षअघि ७४ अर्बको निर्यात भएकोमा गत वर्षमा २ खर्ब ७७ अर्ब पुगेको थियो । नगद अनुदानले व्यवस्था नियमित गरेर व्यावसायिक वातावरण सिर्जना गर्न व्यवसायीले माग गरेका हुन् ।
