काठमाडौं । सरकारले आगामी सातादेखि दशैंलक्षित सुपथ मूल्य पसल सञ्चालनको तयारी गरेको छ ।
देशका १ सय ११ स्थानमा सुपथ मूल्य पसल सञ्चालनको तयारी भएको वाणिज्य मन्त्रालयले जनाएको हो । नागरिकलाई सहुलियतका लागि भने २ करोड ५२ लाख रूपैयाँ विनियोजन गरिएको छ ।
खाद्य व्यवस्था तथा व्यापार कम्पनीले जुम्लाको मार्सी चामल, हुम्लाको सिमी, कर्णाली प्रदेशमा उत्पादन हुने चिनो तथा कागुनो सुपथ मूल्य पसलमा उपलब्ध हुने जनाएको छ ।
बाहिरका पसलमा भन्दा सस्तोमा सामान उपलब्ध गराइने खाद्य व्यवस्था तथा व्यापार कम्पनीका अधिकारीहरूको भनाइ छ । सरकारी स्वामित्वकै साल्ट ट्रेडिङले पनि काठमाडौं उपत्यकासहित देशभर सहुलियत मूल्य पसल सञ्चालनको तयारी गरेको जानकारी दिएको छ ।
यस्तै दुग्ध विकास संस्थानले पनि संस्थानले उत्पादन गरेका दुध, दही र घीउलाई विशेष छुट योजनामा विक्री गर्न लागेको जनाएको छ । सरकारी स्वामित्वका संस्थानहरुले कालोबजारी रोक्नका लागि सहुलियत पसल सञ्चालनको तयारी गरिएको जनाएका छन् । तर यी संस्थानले दिने सहुलियत र सुपथ पसल संख्या निकै न्युन हुने गरेको उपभोक्ताकर्मीहरूको भनाइ छ ।
देशभर १ सय हाराहारीमा पसल सञ्चालन गरेर बजार हस्तक्षेप नपुग्ने उनीहरू बताउँछन् ।
