काठमाडौं । उपप्रधान एवं अर्थमन्त्री विष्णुप्रसाद पौडेलले अन्य मन्त्रालयबाट आएका फाइल नरोकी सहजीकरण गर्न अर्थ मन्त्रालयका कर्मचारीलाई निर्देशन दिनुभएको छ । अन्तरमन्त्रालय समन्वय बढाएर काममा सहजीकरण गर्न उहाँले निर्देशन दिनुभएको हो ।
मन्त्रालयमा कर्मचारीहरूसँगको बैठकमा मन्त्री पौडेलले प्राथमिकताका आधारमा काम अघि बढाउन र बजेट कार्यान्वयनमा लैजान कानूनहरू संशोधन गर्नुपर्ने भएकाले त्यसको गृहकार्य गर्न पनि निर्देशन दिनुभएको छ ।
आगामी आर्थिक वर्षको बजेट कार्यान्वयनका लागि पूर्व तयारीका काममा लाग्न पनि उहाँले कर्मचारीलाई निर्देशन दिनुभएको छ । साथै सोही बैठकमा अर्थ सचिव घनश्याम उपाध्याय र राजस्व सचिव दिनेश घिमिरेले राजस्व संकलन र पुँजीगत खर्च वृद्धिमा सहजीकरण गर्न महाशाखा प्रमुख तथा विभागीय प्रमुखहरूलाई निर्देशन दिनु भएको थियो ।
