काठमाडौं । सरकारले बजेटमार्फत् सुनमा २ प्रतिशत विलासी कर लगाएपछि व्यवसायी आन्दोलित भएका छन् ।
पछिल्लो एक सातादेखि विभिन्न चरणका आन्दोलन गरिरहेका नेपाल सुनचाँदी व्यवसायी महासंघ, नेपाल रत्न आभूषण व्यवसायी महासंघ र नेपाल हस्तकला व्यवसायी महासंघले बिहीबार देशभरका सबै व्यवसाय बन्द गरेर कारोबार ठप्प पारेका हुन् । २ प्रतिशत विलासी कर भने पनि यो व्यवस्था हरेक तहमा लाग्ने हुँदा कम्तीमा पनि करको दर ६ प्रतिशत हुन आउने व्यवसायीको भनाइ छ ।
नेपालीको संस्कार, सामाजिक रीतिरिवाज र धर्मसँग सम्बन्धित भएकाले सुनमा विलासी कर उचित नहुने पनि उनीहरूको भनाइ छ ।
त्यस्तै पत्थरमा १३ प्रतिशत भ्याट भने पनि भ्याट नभएको कुनै वस्तुमा पत्थर जोडिएमा सबैमा भ्याट लाग्ने नियमले महँगो पर्न जाने व्यवसायीको भनाइ छ ।
सरकारले भने सुनचाँदीमा पारदर्शिता नभएका कारण नेपाल एफएटीएफको ग्रे लिस्टमा परेकाले कर लगाउनुपरेको बताएको छ ।
