काठमाडौं । सरोकारवाला तथा विज्ञहरूले नेपालीका प्रमुख श्रम गन्तव्य मुलुकहरूसँग उच्चस्तरको श्रम सम्झौता गरेर श्रमिकको हक अधिकार सुनिश्चित गर्नुपर्नेमा जोड दिएका छन् ।
काठमाडौंमा चलेको राष्ट्रिय श्रम तथा रोजगार सम्मेलनमा संयुक्त ट्रेड युनियन समन्वय केन्द्रकी महिला संयोजक सीता लामाले वैदेशिक रोजगारीमा जानेलाई सामान्य अभिमुखीकरण तालिम पनि दिन नसक्दा श्रमिकहरू समस्यामा परेको बताउनुभयो । त्यस्तै वैदेशिक रोजगार व्यवासायी संघका प्रथम उपाध्यक्ष डिकबहादुर खत्रीले वैदेशिक रोजगारीको इजाजत नलिएका व्यक्तिहरु संलग्नु हुँदा समस्या आएको बताउनुभयो ।
कार्यक्रममा घरेलु महिला श्रमिकमाथि लागेको प्रतिबन्ध फुकाउन विज्ञहरूले जोड दिएका छन् । पूर्वराजदूत शर्मिला पराजुलीले वैदेशिक रोजगारीबाट फर्किएका श्रमिकलाई पुनःस्थापनाको कार्यक्रम ल्याउन सुझाउनुभयो । श्रम आप्रवासनका विविध आयाममाथि विज्ञहरूले प्रस्तुति दिइरहेका छन् ।
हिजोदेखि सुरु सम्मेलनमा आज सूचना प्रविधिको विकासमा नेपालको सम्भावना र रोजगारीका सिर्जना, वैदेशिक रोजगारबाट प्राप्त ज्ञान, सीप र पूँजीलाई उत्पादन र उत्पादकत्व अभिवृद्धिमा विषयमा छलफल हुँदै छ । उत्पादन र उत्पादकत्व विस्तार, आन्तरिक रोजगारीको दिगो आधार भन्ने नारा सहित चलेको सम्मेलनले आन्तरिक रोजगारीको ठोस रणनीति बनाउने छ ।
