काठमाडौं । उज्यालोको पर्व तिहार नजिकिएसँगै अहिले बजारमा सजावटका बत्तीको कारोबार बढेको छ । पछिल्ला वर्षमा विद्युत्को पहुँच बढेसँगै यस्ता घरआँगन सजाउने झिलीमिली बत्तीको कारोबार पनि बढ्दै गएको छ ।
यस वर्ष आयात गर्ने समयमा परेको अविरल वर्षा र बाढीपहिरोले उत्तरी नाका बन्द भएपछि पर्याप्त सामान आउन भने सकेन ।
केही वर्षअघि यस्ता झिलिमिली बत्ती भारतबाट समेत आयात हुने गरेकोमा अहिले भने सबै चीनबाट मात्रै आयात हुने गरेका छन् । तर असोज १० देखि १२ गतेसम्म परेको अविरल बर्षा र बाढीपहिरोले उत्तरी नाका बन्द भएपछि यस बर्ष झन्डै ५० प्रतिशतले आयात घटेको छ । समुद्रीमार्गबाट आयात गरिएको सामानले मात्रै बजार माग धान्दा मूल्यसमेत बढेको उपभोक्ता बताउँछन् ।
तर व्यापारी भने मूल्य स्थिर रहेको दाबी गर्छन् । गत आर्थिक वर्षको पहिलो ३ महिनामा ९ करोड ८४ लाखको झिलिमिली बत्ती आयात भएकोमा यस बर्ष घटेर ४ करोड ७४ लाखको मात्रै आयात भएको छ ।
