काठमाडौं । दशैंको मुखमै राजमार्गहरु अवरुद्ध भएपछि ८ दिनको अवधिमा १ लाख ३९ हजारले हवाई यात्रा गरेका छन् ।
सामान्य अवस्थामा दैनिक ९ हजार जनासम्मले हवाई यात्रा गर्नेमा अहिले १६ देखि १८ हजारले यात्रा गरिरहेका छन् । असोज १३ देखि २० गतेसम्म आन्तरिकतर्फ कुल १४ सय ६३ उडान हुँदा ७६ हजार यात्रु राजधानीबाट बाहिरिएका छन् भने ६३ हजार १ सय यात्रु भित्रिएका छन् ।
पछिल्लो एक सातामा सबैभन्दा बढी उडान असोज १४ गते भएका थिए । यो दिन १९ हजार १ सय ५६ जनाले हवाई यात्रा गरेका थिए ।
त्यस्तै असोज १५ गते २ सय १६ र १६ गते १ सय ८७ उडान भएका थिए । यात्रुको चाप बढेपछि वायु सेवा कम्पनीले उडानलाई पूर्ण क्षमतामा चलाउनुका साथै केही ठाउँमा उडानसमेत थपेका छन् । बुद्ध एयरले भद्रपुर र जनकपुरमा उडान थप गरेर दैनिक उडान संख्या ७१ पुर्याएको छ । त्यस्तै यतीले दुई र श्री एयरलाइन्सले दुई गन्तव्यमा उडान थप गरेका छन् ।
