काठमाडौं । उपप्रधान तथा अर्थमन्त्री विष्णु पौडेलले राजस्वको लक्ष्य पूरा नभए कोही पनि सुरक्षित नहुने बताउनुभएको छ । उहाँले राजस्व संकलनको लक्ष्य पूरा गर्न मातहतका निकायलाई निर्देशन दिनुभयो ।
काठमाडौंमा आज आयोजित एक कार्यक्रममा अर्थमन्त्री पौडेलले सरकारले लिएको राजस्व संकलनको लक्ष्य पूरा गर्न नसके मन्त्री, सचिव, विभागका महानिर्देशक, उपमहानिर्देशक र कार्यालय प्रमुखहरु कोही पनि सुरक्षित नहुने बताउनुभएको हो ।
राजश्वको लक्ष्य जसरी पनि पूरा गर्नुपर्ने भएकाले करदाताहरुसँग मैत्रीपूर्ण व्यवहार गर्न उहाँले मातहतका निकायलाई निर्देशन दिनुभयो । उहाँले कर कार्यालयहरुमा सेवाग्राहीलाई गर्ने व्यवहारमा सुधार गर्न सुझाव दिनुभयो । मन्त्री पौडेलले कर्मचारीहरुलाई लगनशील भएर काम गर्न आग्रहसमेत गर्नुभयो ।
