काठमाडौं । नेपाल राष्ट्र बैंकले ब्याजदर घटाउने रणनीतिका साथ मौद्रिक नीतिको समीक्षा गरेको छ । राष्ट्र बैंकले बैंकहरुले सापटी लिने नीतिगत दर १ प्रतिशत बिन्दु र बैंक दरलाई शून्य दशमलव पाँच प्रतिशत घटाएको छ ।
नयाँ नीतिले राष्ट्र बैंकबाट बैंकहरुमा जाने पैसाको ब्याजदर घट्न र बैंकको लागत कम गर्न सहयोग पुग्नेछ । तर, अहिले बैंकहरुले राष्ट्र बैंकबाट सापटी लिएका छैनन् । बरु बैंकहरुबाटै राष्ट्र बैंकले नै पैसा उठाइरहेको छ । अबका दिनमा कर्जाको माग बढेपछि बैंकहरुको लागत कम पर्ने र त्यसले ब्याजदर घटाउने देखिन्छ ।
नियतवश कर्जा नतिर्नेहरुका लागि नभई परिस्थितिजन्य कारणले समस्यामा परेका ऋणीलाई कर्जा पुनर्संरचना र पुनर्तालिकीकरण गर्ने पनि राष्ट्र बैंकले बताएको छ । ऋणीहरूले बैंकमा निवेदन दिएर बाँकी ब्याजको १० प्रतिशत रकम बुझाएपछि आगामी चैतसम्म कर्जा पुनर्संरचना गर्न सकिने व्यवस्था गरिएको छ ।
ब्याजलाई सावामा थप्न मात्रै हैन कर्जाको किस्ता तिर्ने समय पनि बढाउन सकिनेछ । लघुवित्तका ऋणीहरूले पनि निवेदन दिएमा कर्जा पुनर्संरचना गरिने राष्ट्र बैंकले नीतिगत व्यवस्था गरेको छ ।
गत कात्तिकमा गएको भूकम्पका कारण जाजरकोट तथा रुकुम लगायत जिल्लामा क्षति भएका घरको पुनर्निर्माणको लागि २५ लाखसम्म आधार दरमा २ प्रतिशत थपेर मात्रै ऋण दिनुपर्ने व्यवस्था गरिएको छ ।
भूकम्पका कारण क्षति भएका विद्यालय र सार्वजनिक अस्पतालमा बैंक तथा वित्तीय संस्थाले सामाजिक उत्तरदायित्व अन्तर्गत ४० प्रतिशतसम्म त्यहाँ खर्च गर्न सक्ने व्यवस्था गरिएको छ । ५० लाखसम्मको सेयर कर्जा जोखिम भार घटाएर १ सय २५ प्रतिशत कायम गरिएको छ ।
सम्बन्धित समाचार...
राष्ट्र बैंकद्वारा मौद्रिक नीतिको पहिलो त्रैमासिक समीक्षा सार्वजनिक
