काठमाडौं । नेपाली बजारमा आज सुनको मूल्य फेरि बढेको छ ।
नेपाल सुनचाँदी व्यवसायी महासंघका अनुसार बिहीबार सुनको मूल्य प्रतितोला एक हजार दुई सय रुपैयाँ वृद्धि भएको छ ।
बिहीबार छापावाल सुन प्रतितोला एक लाख नौ हजार रुपैयाँमा कारोबार भइरहेको छ । अघिल्लो दिन बुधबार प्रतितोला एक लाख सात हजार आठ सय रुपैयाँ कायम गरिएको थियो ।
तेजाबी सुनको मूल्य आज प्रतितोला एक लाख आठ हजार पाँच सय रुपैयाँ पुगेको छ । बुधबार एक लाख सात हजार तीन सय रुपैयाँमा कारोबार भएको थियो ।
यही चैत ५ गते प्रतितोला एक लाख दश हजार रुपैयाँ पुगेको सुनको मूल्यले हालसम्मकै उच्चबिन्दुमा पुगेर रेकर्ड कायम गरेको थियो । त्यसयता केही दिन ओरोलो लागेको मूल्य आज फेरि उकालो लागेको हो ।
यस्तै चाँदीको मूल्य पनि आज तोलामा २५ रुपैयाँ बढेको छ । चाँदी प्रतितोला एक हजार ३६० रुपैयाँमा किनेबेच भइरहेको महासंघले जनाएको छ । बुधबार तोलाको एक हजार ३३५ रुपैयाँ कायम गरिएको थियो ।
