बागलुङ । सुन्तलामा फूल फूल्ने समय नजिकिनै लागिसक्यो । तर बागलुङका किसानले बजार नपाएका कारण पँहेलै भएर पाकेका सुन्तला अझै टिपेका छैनन् । सिजन सकिने बेलासम्म पनि ग्राहक नपाउँदा किसान चिन्तामा छन् ।
बागलुङका किसानले पुस पहिलो साताभित्र टिपिसक्नुपर्ने सुन्तला माघको तेस्रो हप्तासम्म पनि बोटमै राखेका छन् । ग्रामीण क्षेत्रमा उत्पादिन सुन्तलाले उचित मूल्य र बजार नपाउँदा बोटमै रहेको हो ।
खरिदको लागि व्यापारी नआउनु र बजारमा लगेर सहजै बिक्री गर्ने अवस्था नभएपछि यहाँका किसान समस्यामा छन् । विगतमा सुन्तला खरिद गर्न पर्वत, म्याग्दी, चितवन तथा काठमाडौंसम्मका व्यापारी आउने गरेपनि यस वर्ष भने अहिलेसम्म आएका छैनन् ।
बागलुङको सिगाना, तित्याङ, बिहा, गल्कोट, जैमिनीलगायतका किसानले व्यवसायिक सुन्तला खेती गर्दै आएका छन् । समयमा टिप्न नपाउँदा पँहेलै पाकेका सुन्तला र्झन थालिसकेका छन् । बारीमा लगाइएका सुन्तला यस वर्ष त्यतिकै खेर जाने सम्भावना बढेको किसानको दुखेसो छ ।
बोटबाट ६० रुपैयाँमा बिक्री हुने सुन्तलाको बजार मूल्य भने एक सय २० रुपैयाँ छ । जिल्लाका १० हजार किसानले सानोठूलो क्षेत्रफलमा सुन्तला खेती गरिरहेका छन् । एक लाखदेखि १५ लाख रुपैयाँसम्म आम्दानी गर्ने किसान अहिले निराश छन् । किसानले उत्पादन गरेका सुन्तला बिक्री र बजारीकणको लागि पहल गर्ने कुनै निकाय छैन ।
बागलुङमा सुन्तला खेतीको क्षेत्रफल बढ्दै गएपनि उत्पादन भने घट्दै गएको छ । जिल्लामा ५ सय ५८ हेक्टरमा सुन्तला खेती हुने गरेको छ । यस वर्ष ३ हजार ६ सय ५० मेट्रिक सुन्तला फलेको अनुमान छ ।
