काठमाडौं । इंग्लिस प्रिमियर लिग-ईपीएलमा आइतबार ४ वटा खेल हुँदै छन् ।
अमेरिकन एक्सप्रेस स्टेडियममा साँझ पौने ७ बजे ब्राइटनले म्यानचेस्टर सिटीको सामना गर्दै छ । ब्राइटन र सिटी दुवै टोलीका लागि गत सातको खेल निराशाजनक रहेको थियो ।
ब्राइटन एभर्टनसँग २-० ले पराजित भएको थियो । त्यस्तै, पेप ग्वार्डियोलाको सिटी पनि आफ्नै घरेलु मैदानमा टोटनहमसँग २-० ले हार्दा ११ खेल लामो अपराजित यात्रा रोकिएको थियो ।
तर स्काई ब्लुजले पछिल्ला पाँच अवे खेलमा अपराजित रहँदै सबै खेलमा क्लिनसिट राखेको छ । यदि यस खेलमा पनि सिटीले गोल नबेहोरे क्लब इतिहासमै पहिलोपटक लगातार ६ अवे खेलमा क्लिनसिट राख्ने रेकर्ड बनाउनेछ ।
ब्राइटन भने सुरूका तीन खेलमा जितविहीन हुने खतरा छ । यद्यपि, इएफएल कपमा अक्सफोर्ड युनाइटेडलाई ६-० ले हराएको टोली आत्मविस्वासी देखिन्छ ।
सिटीका एर्लिङ हाल्यान्डका लागि यो खेल विशेष हुनेछ । उनी आज आफ्नो एक सयौं प्रिमियर लिग खेल खेल्दैछन् ।
सवा ९ बजे एनफिल्डमा हुने अर्को भिडन्तमा डिफेन्डिङ च्याम्पियन लिभरपुलले साविक उपविजेता आर्सनललाई स्वागत गर्दैछ । यो भिडन्तलाई प्रारम्भिक टाइटल-डिसाइडरका रूपमा हेरिएको छ । दुवै टोलीले हालसम्म लिगमा शतप्रतिशत जित निकाल्दै शानदार सुरुवात गरेका छन् ।
अर्ने स्लटको नेतृत्वमा रेड्सले आक्रामक फुटबल खेल्दै आएको छ । तर, डिफेन्समा भने कमजोरी प्रष्ट देखिएको छ । लिभरपुलले आज गोल गर्न सके लगातार ३७ खेलमा गोल गरेको नयाँ क्लब रेकर्ड बन्ने छ ।
मिकेल अर्टेटाको टोलीले यस सिजन सुरुवाती तीन खेलमा गोल नखाई जित हात पार्ने लक्ष्य राखेको छ । यो उपलब्धी आर्सनलले पछिल्लो १ सय १ वर्षयता हासिल गर्न सकेको छैन । तर, आर्सनलका लागि खेल सहज हुने छैन ।
प्रमुख खेलाडीहरू बुकायो साका र काई हाभट्र्ज चोटका कारण बाहिर छन् भने कप्तान मार्टिन ओडेगार्ड पनि फिटनेस परीक्षणमा छन् । यद्यपि टोलीसँग वैकल्पिक गहिराई राम्रो भएकाले अर्टेटाले प्रतिस्पर्धात्मक टिम मैदानमा उतार्नेछन् ।
आजै साँझ पौने ७ बजे नटिङ्हम फरेस्ट र वेस्टहम तथा राति पौने १२ बजे एस्टन भिल्ला र क्रिस्टल प्यालेस पनि प्रतिस्पर्धा गर्ने छन् ।
