काठमाडौं । पोखरा थन्डर्सले तेस्रो संस्करणको नेपाल सुपर लिग (एनएसएल)मा पहिलो जित हात पारेको छ । दशरथ रंगशालामा आज भएको पहिलो खेलमा पोखराले काठमाडौं रेजर्सलाई २-० ले स्तब्ध गरेको हो ।
यससँगै पोखराले जारी लिगमा अंकको खाता खोलेको छ । यसअघि लगातार दुई खेल हारेको पोखरालाई जित्नैपर्ने दबाब थियो ।
खेलको सातौं मिनेटमा पोखरा गोल बेहोर्नबाट जोगिएको थियो । भिनसेन्ट कोजिएलोले बक्सभित्र बुया टुरेलाई पास दिए पनि गोल गर्न सकेनन् । गोलरक्षक प्रिसोलाई विग गरे पनि विलियम बिएस्सीले गोल हुनबाट जोगाएका थिए । रिबाउन्डमा अमादोउ डिओपको प्रयासलाई पनि असफल पारेपछि पोखराका लागि खतरा टरेको थियो ।
२३ औं मिनेटमा काठमाडौंका गोलकिपर अभिषेक बरालले राम्रो बचाउ गरे । पोखराका कप्तान आयुषको पासमा मार्की खेलाडी समिर तामाङले बल अघि बढाउँदै प्रहार गरेका थिए । तर अभिषेक बाधक भएपछि पोखराले गोल गर्न सकेन । २५ औं मिनेटमा पोखराले स्टेफेन विनोङको गोल मार्फत अग्रता बनायो । साइददोस्तोनले दिएको पासमा स्टेफेनले बक्सभित्रबाट हेड मार्फत गोल गरे । अभिषेकले बल रोक्ने कुनै अवसर समेत पाएनन् । ३३ औं मिनेटमा पोखराले अग्रता दोब्बर पार्ने अवसर खेर फाल्यो । काठमाडौंका कप्तान कुलदीप कार्कीले स्टेफेन विनोङलाई बक्समा फाउल गरेपछि पोखराले पेनाल्टी पाएको थियो । तर स्टेफेन विनोङको पेनाल्टी अभिषेकले सहजै रोके । पहिलो हाफमा काठमाडौंले थुप्रै अवसर खेर फाल्दा मध्यान्तरसम्म पोखराले १-० को अग्रता बनाएको थियो ।
५८ औं मिनेटमा पोखराले उपहार गोल मार्फत अग्रता दोब्बर पार्यो । आयुष घलानको क्रसमा सुदिल राईले गरेको प्रहार काठमाडौंका अलिजोनलाई लाग्दै आत्मघाती गोल भएको थियो । ८५ औं मिनेटमा दिनेश हेन्जानको पासमा काठमाडौंका अनमार्कड खेलाडी बुया टुरेको हेडर बारमा लागेर फर्कियो । काठमाडौंले त्यसपछि पनि अन्य थुप्रै अवसर खेर फाल्यो । यससँगै पोखराले जारी सिजन पहिलो जित हात पार्यो ।
तेस्रो खेलमा पहिलो जित हात पारेको पोखराले ३ अंक जोडेको छ । पोखरा पहिलो खेलमा चितवनसँग २-० र दोस्रो खेलमा ललितपुरसँग २-१ गोलअन्तरको हार बेहोरेको थियो । यसअघि ललितपुरसँग २-२ र झापासँग गोलरहित बराबरी खेलेको काठमाडौंको यो पहिलो हार हो । तीन खेलमा उसले मात्र २ अंक जोडेको छ ।
