काठमाडौं । हङकङमा आयोजना हुने चार देश सम्मिलित टी-२० अन्तर्राष्ट्रिय क्रिकेट प्रतियोगिताका लागि नेपालको अन्तिम टोली घोषणा गरिएको छ । नेपाल क्रिकेट संघ (क्यान) ले रोहित पौडेलको कप्तानीमा १४ सदस्यीय अन्तिम टोली घोषणा गरेको हो ।
नेपालसहित आयोजक हङकङ, यूएई र मलेसिया सहभागी हुने सिरिज चैत २७ गते देखि ३१ गतेसम्म हङकङमा आयोजना हुनेछ । नेपाली टिममा कप्तान रोहितसँगै दीपेन्द्रसिंह ऐरी, कुशल भुर्तेल, आसिफ सेख, सोमपाल कामी, ललित राजवंशी, कुशल मल्ल, करण केसी, बसिर अहमद, साहब आलम, नन्दन यादव, रिजन ढकाल, गुलशन कुमार झा र लोकेश बम छन् ।
हालै शल्यक्रिया गराएका सन्दीप लामिछाने रिकभर भइरहेको र अनिल साह चोटका कारण प्रारम्भिक टोलीमै परेका थिएनन् । सन्दीपलाई लिग -२ को तयारी क्याम्पमा भने बोलाइएको छ । नन्दन यादवले पहिलो पटक राष्ट्रिय टोलीमा स्थान बनाउँदा बसिर अहमद र साहब आलमले सन् २०२२ पछि पहिलोपटक टी-२० आई टोलीमा पुनरागमन गरेका छन् । प्रतीश जीसी र सन्दीप जोराले टिममा स्थान बनाउन सकेनन् ।
नवनियुक्त प्रशिक्षक स्टुअर्ट ल विविध कारणले उपलब्ध नहुँदा नेपाल ‘ए’ टिमका प्रशिक्षक ज्ञानेन्द्र मल्ललाई सिनियर टिमको प्रशिक्षकको जिम्मेवारी दिइएको छ ।
क्यानले जारी गरेको क्यालेन्डर अनुसार नेपाली टोली यो प्रतियोगितापछि बेलायत भ्रमणमा निस्कने छ । त्यसपछि नेपालले स्कटल्यान्डमा घरेलु टोलीसहित नेदरल्यान्ड्स सम्मिलित लिग-२ सिरिज खेल्ने छ ।
