काठमाडौं । भारतीय एम्बुलेन्समा ल्याइँदै गरेको ठूलो परिणाममा अवैध लागूऔषध ट्रामाडोल क्याप्सुल नेपाल प्रहरीले बरामद गरेको छ । शनिबार दिउँसो ललितपुर जिल्लाको कान्ति लोकपथ सडकखण्डमा रहेको प्रहरी चौकी भट्टेडाँडाको चेकपोस्टमा खटिएको प्रहरी टोलीले भारतीय एम्बुलेन्समा ठूलो परिणाममा अवैध लागूऔषध ट्रामाडोल क्याप्सुल बरामद गरेको हो ।
एक पत्तामा १० क्याप्सुल भएको ट्रामाडोल हाइड्रोक्लोराइड क्याप्सुल आईपी ट्रामाडोल लेखिएको ट्रामाडोल क्याप्सुल ५ हजार ४ सय पत्ता, एक पत्तामा १० क्याप्सुल भएको ट्रामाडोल हाइड्रोक्लोराइड क्याप्सुल आईपी ५० एमजी ट्रामन लेखिएको ट्रामाडोल क्याप्सुल ४ हजार ८ पत्ता गरी जम्मा ९ हजार ४०८ पत्ता, क्याप्सुल थान ९४ हजार ८० र बीआर ०५ पीए ०४२१ नम्बर भएको भारतीय एम्बुलेन्स र मोबाइल ३ थान बरामद गरेको प्रहरी उपरीक्षक नरहरि रेग्मीले बताउनुभयो ।
पक्राउ पर्नेमा भारत बिहारस्थित मोतिहारी जिल्ला टुमरिया ग्राम पञ्चायत वार्ड नम्बर ५ स्थायी वतन भएका २० वर्षका समीर आलम, भारतकै मोतिहारी जिल्ला राजबजार नगर वार्ड नम्बर ३३ बताउने वर्ष ३३ का मोहम्मद मुन्ना अन्सारी, मोतिहारीको पलानवा ग्राम पञ्चायत वार्ड नम्बर ९ स्थायी वतन बताउने वर्ष ४५ का नोर्जान खातुन, मोतिहारी जिल्ला नगर वार्ड नम्बर ५ पछियाटोल स्थायी वतन भएका वर्ष २२ का मोहम्मद उमर सिद्धिकी (एम्बुलेन्स चालक) रहेका छन् ।
सवारीसाधन चेकजाँच गर्ने क्रममा वीरगञ्जबाट काठमाडौंतर्फ तीव्र गतिमा आइरेको बीआर ०५ पीए ०४२१ नम्बर भएको भारतीय एम्बुलेन्समा चेकजाँच गर्दा लागुऔषध बरामद भएको जिल्ला प्रहरी परिसर ललितपुरले बताएको छ । एम्बुलेन्सको बिरामी राख्ने ठाउँमा कालोमा सेतो धर्का भएको र कालोमा हरियो धर्का भएको समेत गरी दुई वटा छुट्टा छुट्टै झोलामा उक्त परिणामको अवैध लागूऔषध ट्रामाडोल क्याप्सुल लुकाई छिपाई ल्याएको अवस्थामा फेला पारिएको रेग्मीले बताउनुभयो ।
एम्बुलेन्समा एक बालक र एक बालिका सहित ६ जना रहेको प्रहरीले बताएको छ ।
