अछाम । घाँटीमा मासु अड्किएर अछाममा एक जनाको मृत्यु भएको छ । साँफेबगर नगरपालिका-५ नवाठानाका ४२ वर्षीय डम्मरबहादुर कुँवरको घाँटीमा मासु अड्किएर मृत्यु भएको जिल्ला प्रहरी कार्यालयले जनाएको छ ।
चैते दशैंका अवसरमा गाउँमा काटेको खसीको मासु घरमा ल्याई पकाएर खाने क्रममा कुँवरको घाँटीमा मासु अड्किएको थियो । त्यसपछि बेहोस हुनुभएका कुँवरलाई उपचारका लागि बयालपाटा अस्पताल लगिएकामा दिउँसो १२ बजे उहाँको मृत्यु भएको जिल्ला प्रहरी प्रमुख डीएसपी ईश्वरीप्रसाद भण्डारीले बताउनुभयो ।
घटनाको थप अनुसन्धानका लागि इलाका प्रहरी कार्यालय साँफेबगरका प्रहरी निरीक्षक उमेशबहादुर चन्दको नेतृत्वमा टोली खटाइएको डीएसपी भण्डारीले बताउनुभयो ।
