काठमाडौं । अन्तर्राष्ट्रिय रेडक्रस तथा रेडक्रिसेन्ट समाज महासंघ (आईएफआरसी)ले नेपाल रेडक्रस सोसाइटीका अध्यक्षसहित पाँच जना पदाधिकारीलाई बर्खास्त गरेको छ ।
आईएफआरसीले रेडक्रसको अन्तरार्ष्ट्रिय मान्यताविपरीत कार्य गरेको भन्दै रेडक्रसका सभापति सुदर्शनप्रसाद नेपालसहितका पाँच पदाधिकारीलाई बर्खास्त गरेको हो । कारबाहीमा पर्नेमा महामन्त्री भूपतिलाल श्रेष्ठ, कोषाध्यक्ष विनोदकुमार बस्नेत, उपमहामन्त्री मनोजकुमार थापा र सदस्य नारायण तिमिल्सिना रहेका छन् ।
उनीहरूलाई आगामी दिनमा हुने निर्वाचनमा समेत भाग लिन नपाउने गरी प्रतिबन्ध लगाइएको आईएफआरसीले जनाएको छ । रेडक्रसको निष्पक्षता र स्वतन्त्रता जस्ता अन्तर्राष्ट्रिय मान्यताहरू उल्लंघन गरेको भन्दै यी पदाधिकारीहरूलाई पदबाट बर्खास्त गरिएको जनाइएको छ। गत निर्वाचनमा यी पाँच पदाधिकारीले नेपाली कांग्रेस, नेकपा माओवादी केन्द्र र नेकपा एकीकृत समाजवादीका बीच गठबन्धन गरी भागबण्डा गर्ने समझदारीमा गरेका थिए।
आईएफआरसीले अन्य पदाधिकारीको विषयमा समेत छानबिन गरिरहेको जनाएको छ ।
