काठमाडौं । इन्डियन प्रिमियर लिग-आईपीएल को १५औं खेल आज डिफेन्डिङ च्याम्पियन कोलकाता नाइट राइडर्स केकेआर र रनर अप सनराइजर्स हैदराबादबीच कोलकाताको घरेलु मैदान ईडन गार्डेन स्टेडियममा हुने छ । यो खेल साँझ पौने ८ बजे सुरु हुनेछ ।
दुवै टिमले यो सिजनमा ३-३ खेल खेलेका छन् । दुवै टोलीले १-१ खेलमा जित हात पारेका छन् भने समान २-२ खेलमा पराजय व्यहोरेका छन् ।
गत सिजनको फाइनल पनि यी दुई टिमबीच नै भएको थियो, जहाँ कोलकाताले हैदराबादलाई ८ विकेटले पराजित गर्दै तेस्रो पटक आईपीएलको उपाधि जितेको थियो ।
कोलकाता नाइट राइडर्स हेड-टु-हेड रेकर्डमा सनराइजर्स हैदराबादमाथि हाबी छ । यी दुईबीच हालसम्म २८ खेल भएका छन्, जसमा १९ खेल कोलकाताले जितेको छ भने ९ खेल हैदराबादले आफ्नो पक्षमा पारेको छ । ईडन गार्डेनमा भएको १० खेलमध्ये ७ खेलमा केकेआर र ३ खेलमा हैदराबाद विजयी भएका छन् ।
यो सिजन हैदराबदका ट्राभिस हेडले ३ खेलमा १ सय ३६ रन बनाएका छन् भने अनिकेत वर्माले ३ खेलमा १ सय १७ रन जोडेका छन् । उनको स्ट्राइक रेट २ सय ५ भन्दा धेरै छ । त्यसैगरी ईशान किशनले ३ खेलमा १ सय ८ रन बनाएका छन् ।
यता, कोलकाता नाइट राइडर्सका क्विंटन डी कक ले ३ खेलमा १ सय २ रन बनाउँदा अजिंक्य रहाणेको नाममा ३ खेलमा ८५ रन छ । वरुण चक्रवर्ती टिमको टप विकेट टेकर हुन् । ईडन गार्डेनको पिच ब्याटिङको लागि अनुकूल मानिन्छ।
यहाँ हालसम्म ९४ आईपीएल खेल भएका छन्, जसमा पहिलो ब्याटिङ गर्ने टोलीले ३८ खेल जितेका छन् भने लक्ष्य पछ्याउने टोलीले ५६ खेल जितेका छन् । यसलाई ध्यानमा राख्दै टस जित्ने टोलीले पहिले बलिङ रोज्न सक्ने सम्भावना छ। पिचमा उच्च स्कोरको सम्भावना हुने भएकाले दर्शकहरूले रोमाञ्चक खेलको अपेक्षा गर्न सक्छन् ।
