काठमाडौं । मर्सीसाइड डर्बीमा एभर्टनलाई पराजित गर्दै लिभरपुल इंग्लिस प्रिमियर लिगकाे उपाधि नजिक पुगेको छ । अरने स्लटको टोलीले अब उपाधि पक्का गर्न २४ मध्ये १३ अंक मात्र जुटाउन बाँकी छ ।
गएराति लिभरपुलको एनफिल्ड रंगशालामा खेलको सुरूआतमा एभरटनका डिफेन्डर जेम्स टारकोव्स्कीले एलेक्सिस म्याक एलिस्टरमाथि खतरनाक ट्याकल गरेपनि रातो कार्डको सट्टा पहेँलो कार्ड पाए ।
सो अवस्थामा भिएआरले निर्णय परिवर्तन नगरेपछि लिभरपुल समर्थकहरू असन्तुष्ट देखिए । खेलको पहिलो हाफमा एभर्टनको बलियो रक्षापंक्तिले लिभरपुललाई निराश पारेको थियो ।
तर, ५६औं मिनेटमा डियोगो जोटाले गोल गर्दै घरेलु समर्थकमाझ लिभरपुललाई अग्रता दिलाए । जोटाले लुइस डियाजको ब्याकहिल पासलाई लिएर उत्कृष्ट ड्रिबल गर्दै गोल पोस्टमा बल पठाए । तर, गोलमा विवाद पनि देखियो । रिप्लेमा डियाज अफसाइडमा रहेको देखिएपनि रेफ्रीले खेलमा प्रभाव नपरेको भन्दै गोललाई मान्यता दिए ।
एभरटनका फरवार्ड बेटोले लिभरपुलको रक्षापंक्तिलाई संकटमा पार्दै गोल गरेपनि अफसाइडका कारण मान्यता पाएन । दोस्रो प्रयासमा पनि गोलपोस्टमा प्रहार गरे पनि सफल हुन सकेनन् ।
दोस्रो हाफमा लिभरपुलले आक्रामक खेल्दै थप दबाब बनायो । रयान ग्राभेनबर्चको प्रहारलाई जोर्डन पिकफोर्डले रोक्न सफल भएपनि जोटाको निर्णायक गोलले लिभरपुललाई जित दिलायो । यो जितसँगै लिभरपुलले ३० खेलबाट ७३ अंक बनाएको छ।
