सुनसरी । दोस्रो संस्करणको इटहरी मेयरकप अन्तरपालिका स्तरीय क्रिकेट प्रतियोगिता बिहीबारदेखि हुने भएको छ ।
इटहरी उपमहानगरपालिकाले संयोजन गरेको प्रतियोगिता १० दिनसम्म चल्ने आयोजक सेभेन स्टार क्लबले जनाएको छ ।
इटहरी-९ स्थित जनता क्रिकेट मैदानमा हुने प्रतियोगितामा झापा, मोरङ, सुनसरी, उदयपुर र धनकुटा जिल्लाका १८ वटा पालिकाको टिमले सहभागिता जनाउनेछन् ।
प्रतियोगिताको विजेताले नगद १ लाख रुपैयाँ र ट्रफी पाउनेछ । उपविजेता टिमले नगद ५० हजार रुपैयाँ पाउने आयोजकले जनाएको छ ।
प्रतियोगिताकोको सर्वोत्कृष्ट खेलाडीलाई नगद ७ हजार प्रदान गरिने र उत्कृष्ट क्याचर र बलरलाई जनही ४-४ हजार रुपैयाँ प्रदान गरिनेछ ।
प्रतियोगिता सम्पन्न गर्न कुल १९ लाख ४० हजार ५ सय रुपैयाँ खर्च लाग्ने अनुमान गरिएको आयोजकले जनाएको छ । गत संस्करणको उपाधी विराटनगर महानगरपालिकाले जितेको थियो ।
