काठमाडौं । आईसीसी च्याम्पियन्स ट्रफीको उद्घाटन खेलमा आयोजक राष्ट्र पाकिस्तान पराजित भएको छ । पाकिस्तानलाई ६० रनले हराउँदै न्युजिल्यान्डले प्रतियोगितामा विजयी सुरूआत गरेको छ ।
टस हारेर पहिले ब्याटिङ गरेको न्युजिल्यान्डले निर्धारित ५० ओभरमा ५ विकेटको क्षतिमा ३२० रन बनाएको थियो । जवाफी ब्याटिङमा उत्रिएको पाकिस्तानले ४७ ओभर २ बलमा सबै विकेट गुमाएर २६० रन मात्र बनाउन सक्यो ।
न्युजिल्यान्डलाई जित दिलाउन टम लेथम र विल यङले महत्त्वपूर्ण शतकीय पारी खेले । लेथमले ११८ रन तथा यङले १०७ रन बनाए । यस्तै ग्लेन फिलिप्सले ६१ रनको पारी खेले । बलिङतर्फ पाकिस्तानका नसीम शाह र ह्यारिस रउफले २-२ विकेट लिए भने अब्रार अहमदले १ विकेट लिए ।
पाकिस्तानका लागि खुशदिल शाहले सर्वाधिक ६९ रन बनाए । बाबर आजमले ६४ रनको पारी खेल्दा सलमान अली आघाले ४२ रनको पारी खेले । फखर जमानले २४, ह्यारिस रउफले १९, शाहीनशाह अफ्रिदीले १४ तथा नसीम शाहले १३ रन बनाए । अन्य खेलाडीले दोहोरो अंकमा रन बनाउन सकेनन् ।
बलिङतर्फ न्युजिल्यान्डका विल ओरुर्के तथा मिचेल स्यान्टनरले ३-३, म्याट हेनरीले २ तथा माइकल ब्रेसवेल र नेथन स्मिथले १-१ विकेट लिए ।
जितसँगै न्युजिल्यान्ड २ अंक सहित समूह ‘ए’ को शीर्ष स्थानमा छ । यो समूहमा भारत र बंग्लादेश पनि छन् । च्याम्पियन्स ट्रफीमा भोलि भारत र बंग्लादेश भिड्नेछन् । खेल नेपाली समय अनुसार दिउँसो २:४५ बाट सुरू हुनेछ ।
