काठमाडौं । लिभरपुलले संघर्षरत इप्सविच टाउनलाई सहजै पराजित गर्दै इङ्लिस प्रिमियर लिगको शीर्ष स्थानमा ६ अंकको अग्रता बनाएको छ ।
६ वर्षमा दोस्रो लिग उपाधिको खोजीमा रहेको लिभरपुलले पहिलो हाफमै ३ गोल गर्दै इप्सविचमाथि दवाब बनाएको थियो । घरेलु मैदान एनफिल्डमा खेलको ११औं मिनेटमा डोमिनिक सोबोस्लाले गोल गर्दै लिभरपुललाई सुरुवाती अग्रता दिलाए ।
३५औं मिनेटमा महोमद सलाहले गोल गरेपछि लिभरपुलले २-० को अग्रता बनायो । ४४औं मिनेटमा गाक्पोले तेस्रो गोल थपे । ६५औं मिनेटमा गाक्पोले व्यक्तिगत दोस्रो गोल गरेपछि लिभरपुल ४-० ले अघि रह्यो । ९०औं मिनेटमा ज्याकब ग्रिभ्सले इप्सविचका लागि सान्त्वना गोल फर्काए ।
जितसँगै लिभरपुलले २२ खेलमा १६ जितसहित ५३ अंक जोडेको छ । लिभरपुल लीगको शीर्ष स्थानमा छ । पराजित इप्सविच १६ अंकसहित लिगको १८औं स्थानमा छ ।
