काठमाडौं । नेपाली सेनाका सविन कार्कीले पाँच किलोमिटर दौडको उपाधि जितेका छन् । ७३ औं अन्तर्राष्ट्रिय भन्सार दिवसको अवसरमा त्रिवि भन्सार कार्यलयले आयोजना गरेको ५ किलोमिटर दौडमा सविन च्याम्पियन बनेका हुन् ।
दौडको रूट भन्सार विभाग त्रिपुरेश्वरदेखि थापाथली, माइतीघर, बानेश्वर, तीनकुने हुँदै त्रिवि भन्सार कार्यालयसम्म थियो । प्रतियोगितामा नेपाल प्रहरी, नेपाली सेना, सशस्त्र प्रहरी बल, भन्सार कर्मचारी, भन्सार एजेन्ट, पारवहन तथा गोदाम व्यवस्थापन समिति, लागूऔषध ब्यूरो लगायत संस्थाका दुई सय जनाको सहभागिता थियो ।
सविनले १९.१३ मिनेटमा दूरी पार गर्दै प्रथम स्थान हासिल गरे भने नेपाली सेनाकै धनबहादुर शाहीले १९.१८ मिनेटमा दूरी पार गर्दे दोस्रो स्थानमा रहे । सशस्त्र प्रहरी बलका मीनबहादुर बस्नेतले २०.२१ मिनेटमा दूरी पार गर्दै तेस्रो स्थान हासिल गरे ।
विजयी प्रतियोगीहरूलाई माघ १३ गते अन्तर्राष्ट्रिय भन्सार दिवसको अवसरमा त्रिवि भन्सार कार्यालयमा हुने विशेष समारोहमा नगद पुरस्कार तथा प्रमाणपत्र वितरण गरिने आयोजकले जानकारी दिएको छ । प्रतियोगितामा पहिलो, दोस्रो र तेस्रो हुनेले क्रमशः ३० हजार , २० हजार, १० हजार रुपैयाँ पाउनेछन् ।
त्रिवि भन्सार कार्यालय, नेपाल भन्सार एजेन्ट संघ काठमाडौं, नेपाल फ्रेट फरवार्डर्स एसोशियशन, नेपाल निर्यात परिषद् काठमाडौं तथा नेपाल कुरियर सेवा संघको संयुक्त आयोजनामा प्रतियोगिता सम्पन्न भएको हो ।
