जय ट्रफी मेन्स एलिट कप : आजका खेल साढे ९ बजेबाट सुरु हुने

काठमाडौं । जय ट्रफी मेन्स एलिट कपमा आज दोस्रो दिनका खेल हुनेछन् । वीरगन्जमा त्रिभुवन आर्मी र नेपाल पुलिस क्लब भिडिरहेका छन् ।

नारायणी क्रिकेट ग्राउन्डमा पुलिसले सात विकेट एक सय तीन रनको स्थितिबाट दिनको सुरुवात गर्नेछ । ललित राजबंशीले सात विकेट लिएपछि पुलिसले आर्मीलाई पहिलो इनिङसमा १ सय २१ रनमै अल आउट गरेको थियो ।

हिजो नै पहिलो इनिङको सुरुवात गरेको पुलिसको पनि ब्याटिङ धरमराएको थियो । ओपनर कुशल भुर्तेल र अर्जुन साउद गोल्डेन डक आउट भएपछि पुलिस दबाबमा आएको हो । आर्मीविरुद्ध अग्रता लिनबाट पुलिस १८ रनले पछि छ । गुल्सन झा ३४ र प्रेम तामाङ एक रन बनाएर क्रिजमा छन् ।

यस्तै जनकपुरकमा मधेश प्रदेश र बागमती प्रदेश आमनेसामने भइरहेका छन् । बागमती दिनको सुरुवात गर्दा दुई विकेट ३४ रनको अवस्थामा हुनेछ । इशान पान्डे नौ र शुभ कंसकार २२ रनमा खेलिरहेका छन् । पहिलो इनिङ्समा मधेश एक सय दुई रनमा समेटिएको थियो ।

सन्दीप लामिछानेले पाँच विकेट लिए । पहिलो दिन हिजो दुवै खेलमा ब्याटरले धैर्य गर्न नसक्दा कुल २९ विकेट खसेको थियो । स्पिनरको नाममा २२ विकेट रह्यो । आजको खेल बिहान साढे ९ बजे सुरु हुनेछ ।