काठमाडौं । नेपाल प्रिमियर लिग (एनपीएल) अन्तर्गत आज भएको पहिलो खेलमा काठमान्डु गुर्खाज विजयी भएको छ । विराटनगर किंग्सलाई एक विकेटले हराउँदै काठमान्डु विजयी भएको हो ।
टस हारेर पहिले ब्याटिङ गरेको विराटनगरले १९ ओभर पाँच बलमा सबै विकेट गुमाउँदै ११७ रन बनाएको थियो । जवाफी ब्याटिङमा उत्रिएको काठमान्डुले १८ ओभर एक बलमा नौ विकेटको क्षतिमा लक्ष्य भेटायो ।
जितसँगै काठमान्डुले प्लेअफमा पुग्ने अंक गणितीय सम्भावना कायमै राखेको छ । यो खेलको नतिजाले सुदूरपश्चिम रोयल्स र चितवन राइनोजलाई भने प्लेअफमा पुर्याएको छ । सुदूरपश्चिम र कर्णाली याक्सबीचको भोलि हुने खेलको नतिजाले काठमान्डुको भाग्य निर्धारण गर्नेछ । काठमान्डु शीर्ष चारमा पुग्न सुदूरले भोलि कर्णालीलाई फराकिलो अन्तरले पराजित गर्नु पर्नेछ ।
