काठमाडौं । क्रिस्टियानो रोनाल्डोको दुई गोलको मद्दतमा अल नासरले एएफसी च्याम्पियन्स लिग एलिट वेस्ट रिजनको समूह चरणमा लगातार चौथो जित हात पारेको छ ।
अपराजित साउदी क्लबले कतारको अल घराफालाई ३-१ गोलले हराएको हो । जितसँगै साउदी प्रतिद्वन्द्वी अल हिललाललाई पछि पार्दै अल नासर दोस्रो स्थामना उक्लिएको छ । अल बेत रंगशालामा पहिलो हाफ गोलरहित बराबरीमा सकिएको थियो ।
खेलको ४६औं मिनेटमा रोनाल्डोले गोल गरेपछि नासरले सुरुवाती अग्रता बनायो । एन्जेलो गाब्रीयलले ५८औं मिनेटमा गोल थप्दै भ्रमण टोलीलाई २-० को अग्रता दिलाए । ६४औं मिनेटमा रोनाल्डोले व्यक्तिगत दोस्रो गोल गरेपछि नासर ३-० को अग्रतासहित बलियो अवस्थामा पुगेको थियो । ७५औं मिनेटमा घराफाका लागि रियाल मड्रिडका पूर्वखेलाडी जोसेलुले गोल फर्काए ।
तर ८४औं मिनेटमा सेनेगलका सेडोयो सानोले आफ्नै देशका साडीयो मानेमाथि खराब च्यालेन्ज गरेपछि घरेलु टोली १० खेलाडीमा समेटियो । जितसँगै ५ खेलमा चार जित र एक बराबरी खेलेको नासर १३ अंकसहित समूह बीको दोस्रो स्थानमा उक्लिएको छ ।
तेस्रो स्थानको अल हिलालभन्दा १ अंक बढी रहेको नासरको समूह लिडर अल अहलीभन्दा २ अंक कम छ । पराजित अल घराफा ४ अंकसहित ८औं स्थानमा छ ।
