काठमाडौं । आईसीसी महिला अन्डर नाइन्टिन टी-२० विश्वकपमा छनोट भएको नेपाली टोली आज साँझ स्वदेश फर्किंदै छ ।
नेपाल क्रिकेट संघ क्यानले सवा ६ बजे टोली त्रिभुवन अन्तर्राष्ट्रिय विमानस्थलमा अवतरण गर्ने जानकारी दिएको हो । पूजा महतोको कप्तानी र महेश रिजालको प्रशिक्षणमा रहेको नेपालले लिगको अन्तिम खेलमा हिजो घरेलु टोली यूएई माथि ८ विकेटको जित हात पार्दै विश्वकपमा स्थान बनाएको हो ।
नेपालको महिला टोली कुनै पनि विश्वकपमा छनोट भएको यो पहिलो पटक हो । महिला अन्डर नाइन्टिन विश्वकप सन् २०२५ को जनवरी १८ देखि २ फेब्रुअरीसम्म मलेसियामा हुनेछ ।
विश्वकपमा १६ टोली सहभागी हुनेछन् । नेपाल रहेको समूह 'डी'मा अस्ट्रेलिया, बंगलादेश र स्कटल्यान्ड छन् । नेपाल २०२७ को अन्डर नाइन्टिन महिला विश्वकपको सहआयोजक राष्ट्र पनि हो । नेपालले सन् २००७ मा अन्तर्राष्ट्रिय क्रिकेटमा डेब्यु गरेको थियो ।
