पोखरा एभेन्जर्सको जर्सी सार्वजनिक

काठमाडौं । नेपाल प्रिमियर लिग एनपिएलको सबैभन्दा महंगो फ्रेन्चाइज टिम पोखरा एभेन्जर्सले जर्सी सार्वजनिक गरेको छ ।

टिमका प्रमुख सल्लाहकार एवं मेन्टर जोन्टी रोड्सले जर्सी सार्वजनिक गरेका हुन् । जोन्टी जर्सी सार्वजनिक गर्न मुस्ताङको लोमान्थाङ पुगेका थिए । पोखरा एभेन्जर्सले क्रिकेटसँगै जलवायु परिवर्तन र दिगो पर्यटनलाई केन्द्रीत गरि लोमान्थाङबाट जर्सी सार्वजनिक गरेको हो ।

पोखराले साँझ काठमान्डौंमा पनि विशेष कार्यक्रम आयोजना गरेको थियो । जसमा मार्की खेलाडी कुशल भुर्तेल पनि उपस्थित थिए । उनी हिजो विहान मात्र अमेरिकामा भएको लिग टु सिरिज खेलेर फर्किएका हुन् ।

हिजै जोन्टी 'राइड विथ जोन्टी रोड्स' कार्यक्रममा सहभागी भएका थिए । पोखरा एभेन्जर्सले नेपाल प्रिमियर लिगमा पोखरेलीहरुको समर्थन जुटाउन र्‍यालीसहित जोन्टीलाई नगर परिक्रमा गराएको थियो । दक्षिण अफ्रिकाका लेजेन्ड जोन्टीले एभेन्जर्ससँग तीन वर्षे सम्झौता गरेका छन् ।