काठमाडौं । राष्ट्रिय महिला लिगअन्तर्गत सुपर लिग चरणका खेल आज देखि सुरु हुँदै छन् । सुपर लिगको पहिलो खेलमा त्रिभुवन आर्मी क्लब र बागमती युथ क्लब प्रतिस्पर्धा गर्ने छन् । सातदोबाटो स्थित एन्फा कम्पलेक्समा हुने खेल दिउँसो तीन बजे सुरु हुनेछ ।
गत भदौ अन्तिममा भएको दोस्रो चरणको लिगमा सहभागी १० टोलीबाट शीर्ष ५ टोली अन्तिम चरणका लागि छनोट भएका थिए । अन्तिम चरणका लागि छनोट भएको कोशी प्रदेशले आर्थिक कारणले प्रतियोगिताबाट नाम फिर्ता लिएको थियो । कोशीले नाम फिर्ता लिएपछि छैठौं स्थानमा रहेको बागमती युथ क्लबले अवसर पाएको छ । सुपर लिग खेल्ने सबै टिमको आफूहरु च्याम्पियन बन्ने दाबी छ ।
प्रतियोगिता सहभागी ५ मध्य एपीएफ, आर्मी र पुलिस क्लब आयोजित प्रि म्याच प्रेस कन्फरेन्समा सहभागी थिए भने वालिङ नगरपालिका र बागमती युथ क्लब अनुपस्थित रहे । माघ १६ गतेसम्म चल्ने अन्तिम चरणमा २४ खेल हुनेछन् । सिङ्गल राउण्ड रोविन लिगका आधारमा हुने सुपर लिगको शीर्ष ४ टोलीबीच फाइनल प्रवेशका लागि प्लेअफमा प्रतिस्पर्धा हुने छ ।
