काठमाडौं । एर्लिङ हालान्डले दुई गोल गरेपछि इंग्लिस प्रिमियर लिगमा म्यानचेस्टर सिटीले पुनरागमन जित हासिल गरेको छ ।
सिटीले ब्रेन्टफोर्डलाई २-१ गोलअन्तरले पराजित गरेको हो । सुरुवाती मिनेटमै गोल बेहोरेपछि पछि परेको सिटीलाई हलान्डले खेलमा फर्काए । यस जितसँगै सिटीले ब्रेन्टफोर्डविरुद्ध शतप्रतिशत जितको कीर्तिमानलाई यथावत राखेको छ ।
खेल सुरु भएको २३ सेकेन्डमा नै ब्रेन्टफोर्डका योएन विसाले सिजनकै सबैभन्दा छिटो गोल गरेपछि सिटी दबाबमा आएको थियो । विसाले हेडरमार्फत गोल गरेका थिए । तर सिटीले १९ औं मिनेटमा पुनरागमन गयो । केभिन डे ब्रुइनको पासमा हालान्डले गोल गरे । ३२ औं मिनेटमा हालान्डले दोस्रो गोल गरेपछि सिटी पहिलो हाफमा २-१ ले अघि रह्यो । त्यसपछि दुवै टिमबाट थप गोल हुन नसक्दा सिटी विजयी भयो ।
यो जितसँगै साविक विजेता सिटीले ४ मध्ये चार वटै खेल जित्दै १२ अंक जोडेको छ । ऊ लिगको शीर्ष स्थानमा छ ।