काठमाडौं । घरेलु टोली श्रीलंका एसिसी महिला टी-२० एसिया कप अन्तर्गत समूह 'बी' मा शतप्रतिश जितसँगै सेमिफाइनलमा प्रवेश गरेको छ ।
गए राति सम्पन्न समूह चरणको अन्तिम खेलमा श्रीलंका समूह विजेताका रुपमा अन्तिम चारमा प्रवेश गरेको हो । पराजित थाइल्यान्ड भने प्रतियोगिताबाट बाहिरिएको छ । यो समूहबाट बंगलादेश उपविजेताका रूपमा अगाडि बढ्यो ।
रंगिरी डम्बुला अन्तर्राष्ट्रिय क्रिकेट मैदानमा टस जितेर पहिला ब्याटिङ गरेको थाइल्यान्डले निर्धारित २० ओभरमा सात विकेट गुमाउँदै ९३ रन बनाएको थियो । उसका नन्नपत कोन्चरोएनकाले ४७, कप्तान थिपच्चा पुत्थावाङले १३ र अपिसरा सुवान्चोराथीले १२ रन बनाए ।
श्रीलंकाका काविशा दिलहरीले दुई विकेट हात पारे ।
थाइल्यान्डले प्रस्तुत गरेको ९४ रनको लक्ष्य श्रीलंकाले ११ ओभर ३ बलमा विना कुनै विकेटको क्षतीमा पूरा गर्यो । श्रीलंकाका कप्तान चमारी अथापथु ४९ र भिष्मी गुनारत्ने ३९ रनमा अविजित रहे ।
यससँगै महिला एसिया कप २०२४ को सेमिफाइनल समीकरण पूरा भएको छ । पहिलो सेमिफाइनलमा भारतले बंगलादेश तथा दोस्रो सेमिफाइनलमा श्रीलंकाले पाकिस्तानको सामना गर्नेछन् । दुबै सेमिफाइनल खेल भोलि हुनेछ भने फाइनल खेल आइतबार खेलिने छ ।