काठमाडौं । एन्फा अन्डर एटिन युथ लिगमा न्युरोड टिम एनआरटीले एपीएफ एफ सीलाई एक शून्य गोलले पराजित गरेको छ । एनआरटीको गोल भने विवादास्पद बनेको थियो ।
जारी लिगमा एनआरटीको यो तेस्रो जित हो । सातदोबाटो स्थित एन्फा कम्प्लेक्समा आज भएको खेलमा एपीएफले अन्तिम समय सम्म एनआरटीलाई गोलरहित बराबरीमा रोकेको थियो । तर दोस्रो हाफको इन्जुरी समयमा एनआरटीका लागि सन्तोष गांन्बाले गोल गरेका थिए । सो गोलमा एपीएफले आपत्ति जनाएको थियो ।
रेफ्रिको निर्णयमा चित्त नबुझेपछि विवादमा उत्रिएका एपीएफका प्रशिक्षक जिवेश पान्डेले रातो कार्ड पाए । जितपछि एनआरटीको चार खेलबाट नौ अंक भएको छ । शीर्ष स्थानको मनाङ मस्र्याङदीको पनि तीन खेलबाट नौ अंक नै छ । एपीएफको जारी लिगमा यो पहिलो हार हो । उसको चार खेलबाट सात अंक छ । आजै भएको अर्को खेलमा संकटा क्लबले थ्री स्टारसँग अंक खोसेको छ ।
एन्फा कम्प्लेक्समानै भएको खेलको पहिलो हाफमा गोल हुन सकेन् । ७८ औं मिनेटमा कृष्ण नेपालीले गोलकिपरको गल्तिको फाइदा उठाउदै गोल गरेपछि थ्री स्टार एक शून्यलेले अघि रहेको थियो । तर इन्जुरी समयमा संकटाका समीर नेपालीले बराबरी गोल फर्काएपछि थ्री स्टार अंक बाड्न बाध्य भयो । संकटाको चार खेलबाट दुई अंक छ । थ्री स्टारको चार खेलबाट ६ अंक भएको छ ।