काठमाडौं । स्पेनिस रफायल नाडाल झन्डै एक वर्षपछि प्रतिस्पर्धात्मक टेनिसमा फर्कने भएका छन् । चोटका कारण कोर्ट बाहिर रहेका नाडालले ब्रिसबेन इन्टरनेशनलमा सहभागिता जनाउने जानकारी दिएका हुन् ।
पूर्व नम्बर एक नाडालले, हिपमा समस्या आएपछि गत जनवरीयता खेलेका छैनन् । उनी अस्ट्रेलियन ओपनको दोस्रो चरणको खेलबाट बाहिरिएका थिए । त्यसपछि उनको हिपको शल्यक्रिया भएको थियो ।
यसअघि उनले सन २०२४ को सिजन अन्त्य भएसँगै खेल जीवनबाट संन्यास लिने योजना सुनाएका थिए । सामाजिक सञ्जालमा भिडियो पोस्ट गर्दै ३६ वर्षीय नाडालले करिब एक वर्षपछि प्रतिस्पर्धामा फर्कने समय आएको बताएका हुन् ।
ब्रिसबेन इन्टरनेशनल, वर्षको पहिलो ग्रान्डस्लाम अस्ट्रेलियन ओपनको वार्मअप हो । नाडालले यो प्रतियोगिता खेल्दै अस्ट्रेलियन ओपनको तयारी गर्नेछन् । नाडाल २२ पटकका ग्रान्डस्लाम च्याम्पियन हुन् ।
उनले सन २००९ र २०२२ मा गरी दुई पटक अस्ट्रेलियन ओपन जितेका छन् ।
