इटहरी । साबिक विजेता सगरमाथा फुटबल क्लब मोरङ इटहरी गोल्डकपको सेमिफाइनलमा प्रवेश गरेको छ ।
इटहरी रंगशालामा शनिबार भएको उद्घाटन खेलमा मोरङले बुढासुब्बा गोल्डकप विजेता एभिनियर फुटबल क्लब क्यामरुनलाई पेनाल्टी सुटआउटमा ४-३ पराजित गरेको हो । निर्धारित समयमा दुवै टिमबाट गोल हुन नसकेपछी खेलको निर्णय पेनाल्टी सुटआउटबाट लिइएको हो ।
पेनाल्टीमा एभिनियरका साबा अलीको प्रहार क्रसबारमा लागेर बाहिरियो । जोय अल्डोको प्रहार सगरमाथाका गोलकिपर च्याङ थेबेले रोकेका थिए ।
सगरमाथाका राजीव लोप्चा, मेसुके, अभिषेक राई, अभिषेक लिम्बूले पेनाल्टीलाई गोलमा परिणत गरे । मोरङ टिममा ए डिभिजन लिग क्लब खुमलटारका खेलाडीको बाहुल्यता छ । भोलि (आइतबार) आयोजक राष्ट्रिय जागृति क्लब र चर्च ब्वाइज युनाइटेडबीच प्रतिस्पर्धा हुनेछ । आठ टिम सहभागी गोल्डकप विजेताले नगद १० लाख र उपविजेताले ५ लाख रुपैयाँ पुरस्कार पाउनेछन् ।
.png&w=400&height=300)
