दोलखा । गौरीशंकर हिमाल रिसाएको भन्दै दोलखा रोल्वालिङ क्षेत्र बेदिङका स्थानीयले क्षमा पूजा गरेका छन् ।
असार २२ गते रोल्वालिङ खोलामा हिमताल फुटेपछि गौरीशंकर हिमाललाई धार्मिक आस्थाको रुपमा पूज्ने स्थानीयले करीब दुई सातादेखि सो हिमालको क्षमा पूजा गर्दैआएका छन् ।
च्छो-रोल्पा हिमताल नजिकै १७ जना लामाले बौद्ध विधि अनुसार भदौ १३ गतेबाट क्षमा पूजा गरिरहेको स्थानीय दावा छिरिङ शेर्पाले बताउनुभयो ।
प्रकृती रिसाएपछि थप संकट हुने र हिमालका तालहरु झन जोखिम भएर बाढी आउने भन्दै लामाहरुले बौद्ध र हिन्दु दुवै विधीमा क्षमा पूजा गरिरहेको प्रमुख लामा ङावाङ तेन्जिङ शेर्पाले बताउनुभयो । भदौ १३ गतेबाट शुरु भएको पूजा भदौ ३० गतेसम्म गरिने छ ।
गएको असार २२ मा रोल्वालिङ खोलामा हिमताल फुटेर आएको बाढीमा एक जना वेपत्ता हुनुको साथै डोगाङका ८ होटल र घर बगाएको थियो । रोल्वालिङ खोलामा आएको बाढीको अझैसम्म अध्ययन भने हुन सकेको छैन् ।
