काठमाडौं । नेपाली कांग्रेसका संस्थापन इतर पक्षका नेताहरूले १४औँ महाधिवेशनबाट निर्वाचित केन्द्रीय कार्य समितिलाई मान्यता दिएर मात्रै आफूहरू नियमित महाधिवेशनमा जान सक्ने अडान राखेका छन् ।
बुधबार आफू पक्षका नेताहरूको भेलामा सहभागी भएका नेताहरू गुरू बराल, डा. रणबहादुर रावललगायतका नेताहरूले विधि र विधान सम्मत ढंगले निर्वाचित सो केन्द्रीय कार्य समितिलाई वैधानिकता दिएर आफूहरू नियमित महाधिवेशनमा जाने पक्षमा रहेको प्रष्ट्याउनुभएको हो ।
नेताहरूले पार्टीको आधिकारिताको विषयमा सर्वोच्च अदालतमा रहेको मुद्दाको फैसला पछि आफूहरू १५औँ महाधिवेशनको तयारीमा जुटने र त्यसमा कांग्रेसका सबै समूहहरू सहभागी हुनुपर्ने जिकिर समेत गरेका छन् । नेता बरालले १४औँ महाधिवेशनबाट निर्वाचित केन्द्रीय कार्य समितिलाई विधिवत रूपमा मानेर आफूहरू १५औँ महाधिवेशनको तयारीमा लाग्ने अडानमा रहेको स्पष्ट पार्नुभयो ।
अर्का नेता डा. रावलले तत्कालीन महामन्त्री गगन थापाको समूहले भेला भएर बनेको केन्द्रीय कार्यसमिति वैधानिक नभएकाले मान्य नहुने जिकिर गर्नुभयो । उहाँले १४औँ महाधिवेशनको नेतृत्वलाई मानेर आफूहरू १५औँ महाधिवेशनको तयारीमा रहेको पनि बताउनु भयो ।
यता, संस्थापन पक्षले भने नियमित महाधिवेशनको तयारी थालिसकेको छ ।
.png&w=350&height=150)
