काठमाडौं । नेपाली कांग्रेसका महामन्त्री विश्वप्रकाश शर्माले विशेष महाधिवेशन पार्टी विधानको व्यवस्थाअनुसार अघि बढ्ने बताउनुभएको छ ।
महाधिवेशनस्थलको अवलोकनको लागि शुक्रबार भृकुटीमण्डप पुग्नुभएका महामन्त्री शर्माले सञ्चारकर्मीहरूसँग कुरा गर्दै सो दाबी गर्नुभएको हो । उहाँले विशेष महाधिवेशनको प्रक्रिया प्रारम्भ भइसकेपछि त्यसको कार्यविधि निर्माण गरिने र सोहीअनुसार महाधिवेशनले नेतृत्व चयनको प्रक्रियामा जाने बताउनु भयो ।
उहाँले पार्टीका कुनै पनि नेताहरूलाई अनादर गर्ने तथा उनीहरूप्रति नकारात्मक टिप्पणी गर्ने पक्षमा आफू नरहेको बताउँदै विधानको व्यवस्थाअनुसार महाधिवेशनको प्रक्रिया अगाडि बढ्नुपर्नेमा जोड दिनुभयो । उहाँले महाधिवेशनमा सहभागी हुन पार्टी सभापति तथा कार्यवाहक सभापतिलाई समेत निमन्त्रणा गरिसकेको बताउनु भयो ।
उहाँले आइतबारदेखि सुरू हुने विशेष महाधिवेशन समग्र पार्टीको साझा मञ्चको रूपमा अगाडि बढ्ने विश्वास समेत व्यक्त गर्नुभयो ।
