काठमाडौं । फागुन २१ गतेको निर्वाचनका लागि सरकारले सक्रियता बढाएको छ ।
दलका दोस्रो तहका नेताहरूसँग सम्वादमा रहनुभएको प्रधानमन्त्री सुशीला कार्कीले मंगलबार दलका उच्चस्तरिय नेतासँग छलफल गर्दै हुनुहुन्छ । त्यसका लागि प्रधानमन्त्री कार्कीले सात दललाई पत्र लेखी निर्वाचन केन्द्रित छलफलका लागि बालुवाटारमा बोलाउनु भएको हो ।
निर्वाचनबारे छलफल गर्नका लागि मंगलबार ४ बजे बालुवाटारमा प्रधानमन्त्रीले कार्कीले राष्ट्रिय मान्यता प्राप्त दललाई २-२ जना उच्चस्तरीय प्रतिनिधि पठाइदिन भनी पत्र लेखेर पठाएको प्रधानमन्त्रीका प्रेस संयोजक राम रावलले जानकारी दिनुभयो ।
प्रधानमन्त्रीले यसअघि विभिन्न दलका विभिन्न तहका नेतासँग अलग-अलग वार्ता गरिसक्नु भएको छ । यस छलफलमा विघटित संसदका प्रमुख राजनीतिक दलहरू नेपाली कांग्रेस, नेकपा एमाले, नेकपा माओवादी केन्द्र, राष्ट्रिय स्वतन्त्र पार्टी, राष्ट्रिय प्रजातन्त्र पार्टी, जनमत पार्टी र जसपा नेपाल (उपेन्द्र यादव) का प्रतिनिधिहरू बोलाइएको हो।
यसअघि राष्ट्रपति रामचन्द्र पौडेल र प्रधानमन्त्री सुशीला कार्कीले दलका प्रतिनिधिहरूसँग राष्ट्रपति कार्यालयमै छलफल गरेका थिए।
