काठमाडौं । प्रधानमन्त्री सुशीला कार्की र भारतका समकक्षी नरेन्द्र मोदीबीच आज कुराकानी हुने भएको छ। प्रधानमन्त्रीको सचिवालयका अनुसार आज प्रधानमन्त्री कार्की र मोदीबीच भिडिओमा सम्वाद हुने लागेको हो ।
नेपालका लागि भारतीय राजदूत नवीन श्रीवास्तवले सिंहदरबारमा प्रधानमन्त्री कार्कीसँग शिष्टाचार भेटमा भारतीय प्रधानमन्त्री मोदीले भिडियो कलमा कुरा गर्न चाहेको जानकारी गराउनुभएको थियो । त्यसअवसरमा प्रधानमन्त्री कार्कीले पारस्परिक हितका विषयमा छलफल गर्न सकिने जवाफ दिनुभएको थियो । त्यसअनुसार आज प्रधानमन्त्री कार्कीले भारतीय समकक्षी मोदीसँग भिडिओ कुराकानी गर्ने लाग्नु भएको हो ।
यसअघि मोदीले प्रधानमन्त्री कार्कीलाई बधाई दिँदै नेपालको समृद्धिको कामना गर्नुभएको थियो भने मणिपुरमा आयोजित एक कार्यक्रमलाई सम्बोधन गर्दै नेपालको असामान्य अवस्थामा नागरिक सरकार गठन हुन सकेकामा स्वागत गर्नुभएको थियो ।
जेनजी आन्दोलनका कारण केपी शर्मा ओलीले भदौ २४ गते प्रधानमन्त्री पदबाट राजीनमा दिएपछि राष्ट्रपति रामचन्द्र पौडेलले भदौ २७ गते राति पूर्वप्रधानन्यायाधीश सुशीला कार्कीलाई अन्तरिम सरकारको प्रधानमन्त्री बनाउनुभएको हो । त्यही राति प्रतिनिधि सभा विघटन गर्नुभएका राष्ट्रपति पौडेलले फागुन २१ गतेका लागि आम निर्वाचन घोषणा गर्नुभएको छ । कार्की सरकारको काँधमा ६ महिनाभित्र प्रतिनिधि सभा सदस्यको निर्वाचन गराउनुपर्ने प्रमुख जिम्मेवारी छ।
