काठमाडौं । पूर्वपरराष्ट्रमन्त्री महेन्द्रबहादुर पाण्डेले कसैको दबाबमा परेर देशको स्वाधिनतामाथि सम्झौता गर्न नहुने बताउनुभएको छ ।
नेपाल चीन कुटनैतिक सम्बन्ध स्थापनाको ७० वर्ष पुगेको अवसरमा फ्रेण्ड्स अन क्लाउडः प्ल्याटफर्म अफ इन्फ्लुएन्सर्स नेपालले काठमाडौंमा गरेको कार्यक्रममा बोल्दै उहाँले यस्तो बताउनुभएको हो ।
प्रधानमन्त्री केपी शर्मा ओलीको आसन्न चीन र भारत भ्रमणमा नेपाली भूमि लिपुलेकमा दुई देशले व्यापार मार्ग खोल्ने गरेको सम्झौतामा स्पष्ट अडान राख्नुपर्ने उहाँले बताउनु भयो ।
उहाँले नेपाललाई भारतले त्यसबारेमा दबाब दिनसक्ने भन्दै देशको स्वाधिनतामा आँच आउने काम कुनैपनि दबाबमा परेर गर्न नहुने सुझाव दिनुभयो । चीन नेपालमाथि कुनै समस्या खडा गर्ने पक्षमा नरहे पनि भारत नेपालमा अस्थिरता र नियन्त्रणमुखी भुमिकामा देखिएको उहाँको टिप्पणी छ ।
२०७२ सालमा पनि यसैगरी सम्झौता भइ आफूले परराष्ट्रमन्त्री हुँदा कुटनीतिक नोट पठाएको उहाँले स्मरण गर्नुभयो । उहाँकाअनुसार अहिले हरेक राजनीतिक दलहरुमा नेतृत्व नभइ कमाण्डिजम हाबी भएको छ ।
कार्यक्रममा विज्ञहरूले नेपालको समग्र हित र चौतर्फी विकासका लागि चीनको प्रत्यक्ष भुमिका अपरिहार्य रहेको विज्ञहरूले औंल्याएका छन् । चीनले कृषि, शिक्षा, प्रविधि, स्वास्थ्य, अन्वेषण लगायतका क्षेत्रमा गरेको उन्नतिबाट नेपालले पनि लाभ उठाउन सक्नुपर्ने बताएका छन् ।
