काठमाडौं । नेकपा माओवादी केन्द्रका अध्यक्ष पुष्पकमल दाहालले आफ्नै पार्टीका नेताहरूप्रति तीव्र असन्तुष्टि व्यक्त गर्नुभएको छ । सार्वजनिक रूपमै नेताहरूले नेतृत्वको आलोचना गरेको भन्दै उहाँले आक्रोस व्यक्त गर्नुभएको हो ।
पार्टी मुख्यालय पेरिसडाँडामा शुक्रबार सुरू भएको स्थायी समितिको बैठकमा अध्यक्ष दाहालले पार्टीका नेताहरू कम्युनिष्ट सिद्धान्तअनुसार नचलेको भन्दै असन्तुष्टि पोख्नुभएको छ ।
उपमहासचिव जनार्दन शर्माले सार्वजनिकरूपमा नेतृत्वको आलोचना गरेकोप्रति संकेत गर्दै उहाँले पार्टी नीति र पद्धतिअनुसार चल्न सम्झाउनुभएको हो । कम्युनिष्ट पार्टीको सिद्धान्त र अनुशासन हराउँदै गएको भन्दै अध्यक्ष दाहालले चिन्ता समेत ब्यक्त गरेको बैठकमा सहभागी नेताहरूले बताएका छन् ।
बैठकमा अध्यक्ष दाहालले पछिल्ला राजनीतिक घटनालगायत पार्टीको आगामी रणनीति र एकीकृत समाजवादीसँगको एकताबारे पनि जानकारी गराउनुभयो । एकीकृत समाजवादीसँगको एकता प्रक्रिया सकारात्मक रूपमा अघि बढे पनि कहिले टुंगो लाग्छ भन्ने यकीन नभएको उहाँको भनाइ थियो ।
दाहालले सबै कम्युनिस्ट पार्टीहरूलाई एकताबद्ध बनाएर लैजानुपर्ने धारणा राख्नुभयो । बैठकमा दाहालले भ्रष्टाचारबाट आफ्ना मान्छे उम्काउन कांग्रेस र एमालेले सरकार गठन गरेको र एक वर्षको अवधिमा त्यसबाहेक अरू काम पनि गर्न नसकेको आरोप लगाउनुभयो ।
स्थायी समिति बैठकमा अध्यक्ष दाहालले राखेका धारणामाथि भोलिदेखि नेताहरूले बोल्ने क्रम सुरू हुनेछ । पदाधिकारी बैठकले तय गरेका ९ वटा एजेण्डामाथि स्थायी समितिमा छलफल हुनेछ ।
