काठमाडौं । माओवादी केन्द्रका अध्यक्ष एवं पूर्वप्रधानमन्त्री पुष्पकमल दाहालले सरकारले आन्दोलनरत शिक्षकका माग सम्बोधन गर्न नसकेको बताउनुभएको छ ।
माओवादी संसदीय दलको सिंहदरबारमा आज बसेको बैठकमा अध्यक्ष दाहालले सरकारले नसकेकाले अब संसद्बाटै शिक्षकका माग सम्बोधन हुनेगरी भूमिका खेल्न पार्टीका सांसदहरूलाई निर्देशन पनि दिनुभयो ।
अध्यक्ष दाहालले सडक र सदनबाट सरकारलाई दबाब दिनुपर्ने बताउनुभयो । अध्यक्ष दाहालले शिक्षक, चिकित्सक तथा लघुवित्त पीडितहरूसँग संवाद भइरहेको जनाउँदै सरकार समस्याको समाधानतर्फ नगई उल्टै जटिलता बढाउने दिशामा गएको पनि दाबी गर्नुभयो ।
बैठकमा भोलिदेखि बस्ने संसदको बैठक, पछिल्लो राजनीतिक घट्नाक्रम, सरकारको कार्यशैली, पार्टीको भूमिका र जनअपेक्षाबारे पनि छलफल भएको थियो ।
