काठमाडौं । शिक्षामन्त्री फेरबदलबाट शिक्षक आन्दोलनप्रति सरकारको संवेदनशीलता घट्दै गएको प्रमुख प्रतिपक्षी दल माओवादी केन्द्रले जनाएको छ । शिक्षकका मागहरू सम्बोधन गर्नका लागि सरकारलाई दबाब पुग्ने गरी भूमिका खेल्न प्रमुख प्रतिपक्षी दलले आफ्ना सांसदहरूलाई निर्देशन पनि दिएको छ ।
सिंहदरबारस्थित् संसदीय दलको कार्यालयमा आज बसेको बैठकमा अध्यक्ष पुष्पकमल दाहालले सडक र सदनबाट सरकारलाई दबाब दिनुपर्ने भन्दै सांसदहरूलाई सोही अनुसार भूमिका निर्वाह गर्न निर्देशन दिनुभएको हो ।
बैठकमा अध्यक्ष दाहालले शिक्षक, चिकित्सक तथा लघुवित्त पीडितहरूसँग संवाद भइरहेको जनाउँदै सरकार समस्याको समाधानतर्फ नगई उल्टै जटिलता बढाउने दिशामा गएको आरोप लगाउनुभयो ।
साथै, प्रधानमन्त्री केपी शर्मा ओलीले आन्दोलनरत शिक्षकहरूसँगको संवादमा आफ्नो नाम जोडेर टिप्पणी गर्नु दुर्भाग्यपूर्ण रहेको दाहालको भनाइ छ । बैठकमा पछिल्लो राजनीतिक घट्नाक्रम, सरकारको कार्यशैली, पार्टीको भूमिका र जनअपेक्षाबारे छलफल भएको सहभागी एक नेताले बताए ।
