पाल्पा । उपप्रधान एवं शहरी विकासमन्त्री प्रकाशमान सिंहले पूर्वविशिष्ट पदाधिकारीको सुविधा सम्बन्धी विधेयक तर्जुमा गर्न गृह मन्त्रालयमा सैद्धान्तिक छलफल भए पनि त्यसको काम अघि नबढाएको बताउनुभएको छ । नेपाल पत्रकार महासंघ पाल्पा शाखाले आज तानसेनमा राखेको पत्रकार भेटघाटमा उपप्रधानमन्त्री सिंहले विधेयकमा छलफल नै गर्न बाँकी रहेको बताउनुभयो ।
विधेयकका विषयमा गहन छलफल गर्न र कानुन बनाउने कामका लागि प्रक्रिया अघि नबढाएकाले सरकारको मनसाय के छ भन्ने प्रस्ट देखिने उहाँको भनाइ छ ।
विगतका सरकारले निर्णय गर्दा पछि अदालतले कानुन बनाएर लागू गर्न निर्देशन दिएकाले मन्त्रिपरिषद्ले सैद्धान्तिक छलफलका लागि गृह मन्त्रालयले प्रस्ताव ल्याएको सिंहले बताउनुभयो । मन्त्रिपरिषद्मा सामान्य छलफल भएर त्यसलाई अगाडि बढाउने भन्दा पनि सैद्धान्तिक स्वीकृत दिएर गृह मन्त्रालयले काम गर्ने भन्ने निर्णय भएको उहाँले बताउनभयो ।
उपप्रधानमन्त्री सिंहले आशा जगाउने खालका समाचार सम्प्रेषण गर्न सञ्चारकर्मीलाई आग्रह गर्नुभयो ।
