काठमाडौं । आम जनता पार्टी (आजपा)का अध्यक्ष एवं पूर्वमन्त्री प्रभु साहले अध्यादेशको अस्त्रले प्रधानमन्त्री केपी शर्मा ओलीलाई नै निर्वस्त्र बनाइदिएको टिप्पणी गर्नुभएको छ । रौतहटमा यमुनामाई गाऊपालिकाको विशेष भेलालाई सम्बोधन गर्दै आजपा अध्यक्ष साहले झन्डै दुईतिहाइ बहुमतको हावा गफ दिने प्रधानमन्त्री ओली नेतृत्वको सरकारले ल्याएको अध्यादेश पारित गर्नका लागि समान्य बहुमत समेत नभएको बताए ।
“तपाईं (ओली) आफैंले ल्याएको अध्यादेशको अस्त्रले तपाईं आफैंलाई निर्वस्त्र बनाइदिएको छ । दुनियाँले देखिरहेको छ तपाईंसँग समान्य बहुमत पनि छैन । त्यसैले तपाईंले कुर्सी छोड्दा नै देश र जनताको हित हुन्छ” साहले भन्नुभयो ।
अध्यक्ष साहले प्रधानमन्त्रीसँग आफैंले ल्याएको अध्यादेश पारित गर्ने बहुमत समेत नभएकाले कुन नैतिकताले पदमा बसेको भन्दै प्रश्न पनि गर्नुभयो ।“म प्रधानमन्त्रीज्यूसँग सोध्न चाहन्छु, तपाईंले त झन्डै दुईतिहाइको बहुमतको शक्तिशाली सरकार भन्नुहुन्छ । तर तपाईं आफैंले ल्याएको अध्यादेश पारित गर्नका लागि तपाईंसँग समान्य बहुमत छैन् । तपाईं कुन नैतिकताले अझै पदमा बस्नुभएछ ?”, साहले भन्नुभयो, “तपाईंले अध्यादेश संसद्मा निर्णयार्थ पेश गरेर किन फिर्ता लिनुभयो ?”
साहले अहिलेको नेपाली कांग्रेस र नेकपा (एमाले)को गठबन्धन नभई ओली र शेरबहादुर देउवाको स्वार्थको गठबन्धन भएको पनि टिप्पणी गर्नुभयो । उहाँले मुलुक र जनताको हितका लागि ओली र देउवाको बन्धनबाट देशलाई तत्काल मुक्त गर्नुपर्ने बताए ।
“यो गठबन्धन अप्रजातान्त्रिक, अप्राकृतिक, अदृश्य एवं अनैतिक हो, यो केवल केपी शर्मा ओलीज्यू र शेरबहादुर देउवाज्यूको स्वार्थको बन्धन हो । दुनियाँले हेरिरहेको छ यो स्वार्थको गठबन्धनले दलाल, बिचौलिया, भ्रष्टहरूको सेवामा समर्पित छ”, आजपा अध्यक्ष साहले भन्नुभयो, “बीपी कोइरालालाई आदर्श मान्ने कांग्रेस र मदन भण्डारीलाई आदर्श मान्ने एमालेका नेता कार्यकर्ताले यो ठगबन्धनलाई कसरी स्वीकारेको होला ?”
